A campaña de Protección Solar da AECC de Teixeiro-Curtis chega aos campamentos de verán para concienciar aos cativos
![Imaxe dos cativos nos campamentos de Curtis](https://acorunaxa.com/wp-content/uploads/2024/07/Imaxe-dos-cativos-nos-campamentos-de-Curtis.jpg)
Co verán xa presente en Galicia, a protección da pel contra a exposición solar é crucial para evitar riscos de cancro de pel. Co obxectivo de concienciar sobre a importancia deste coidado, a Xunta Local da AECC de Teixeiro-Curtis levou a cabo unha campaña de sensibilización nos campamentos de verán de Curtis e Teixeiro.
A campaña incluiu diversas actividades e a distribución de xogos didácticos entre os rapaces, aos que se lles explicou como protexerse adecuadamente do sol. Durante as sesións, os pequenos aprenderon sobre os efectos nocivos da exposición solar e a importancia de usar crema solar de alta protección, aplicándoa sobre a pel seca e renovándoa despois de nadar.
A iniciativa fixo especial fincapé na protección de áreas sensibles como ollos, boca e orellas, e recomendou o uso de gorras e gafas de sol. Tamén se subliñou a importancia de evitar a exposición solar durante as horas do mediodía.
Os xogos didácticos foron ben recibidos e os rapaces participaron activamente, aprendendo de maneira lúdica e divertida sobre como coidar a súa pel durante o verán.