A Cabalgata de Reis 2025 de Sada busca figurantes infantís
O Concello de Sada abre o prazo de inscrición para que nenas e nenos participen como figurantes na Cabalgata de Reis 2025, acompañando ás súas maxestades no tradicional percorrido polas rúas do municipio.
Os participantes deben ter 6 anos cumpridos antes do 1 de xaneiro de 2025. As inscricións de persoas empadroadas en Sada terán preferencia no proceso de selección, e os nenos e nenas seleccionados deberán acudir cun disfrace relacionado co Nadal.
O número de prazas dispoñibles será determinado polos criterios de seguridade das carrozas, e, no caso de haber máis solicitudes que prazas, priorizarase ás persoas máis pequenas empadroadas no municipio. As inscricións poden realizarse ata o 22 de decembro mediante un formulario en liña dispoñible na web municipal, e o listado de admitidos publicarase o 27 de decembro.
O día 5 de xaneiro, os participantes deberán presentarse ás 17:30 horas na explanada da Lonxa de Sada, onde monitores asignados garantirán a súa seguridade durante o evento. Ao finalizar o percorrido, previsto sobre as 19:30 horas, as familias poderán recoller aos figurantes no exterior da Casa da Cultura. Os nenos e nenas levarán unha pulseira identificativa co seu nome e o contacto da persoa responsable.
O Concello informa tamén que se realizarán gravacións e fotografías do evento para a súa promoción en medios e redes sociais municipais.