A asociación Manos Unidas inaugura o Mercadiño Solidario de Nadal na Coruña
Este sábado, 14 de decembro, Manos Unidas inaugurará o seu tradicional Mercadiño Solidario de Nadal nos locais parroquiais da Igrexa de San Nicolás, na Coruña. O obxectivo desta iniciativa solidaria é financiar un proxecto de prevención da violencia de xénero nun campo de desprazados en Xuba, a capital de Sudán do Sur.
O mercadiño estará aberto ao público dende o 14 ata o 22 de decembro. Os horarios serán de 17:00 a 20:00 de luns a venres e, durante a fin de semana, abrirá tamén pola mañá, de 11:00 a 14:00, ademais do horario de tarde.
Os asistentes poderán atopar unha ampla variedade de artigos: cerámica de Buño, antigüidades, cadros, produtos exclusivos de Manos Unidas ideais para agasallos, e creacións especiais do deseñador Lorenzo Caprile, como panos, bolsas e abanicos deseñados para esta causa.
A recadación destinarase a mellorar as condicións de vida e a seguridade de 38.000 persoas que viven en campos de protección de desprazados nos arredores de Xuba. O proxecto busca apoiar ás mulleres vítimas de violencia de xénero e a outras en situación vulnerable a través de formación en actividades xeradoras de ingresos, asesoramento psicosocial e atención médica básica.
Manos Unidas fai un chamamento á cidadanía para visitar o mercadiño, coñecer o seu labor e contribuír a este proxecto tan necesario.