A asociación Faragulla celebra as Letras Galegas con música e baile tradicional en Teixeiro
A Casa da Cultura de Teixeiro encherase este domingo 17 de maio de música, baile e tradición coa celebración do III Festival de Danza e Música Tradicional da Asociación Cultural Faragulla. A cita, organizada con motivo do Día das Letras Galegas, dará comezo ás 18.00 horas e propón unha tarde para gozar da cultura popular galega da man dos grupos que forman parte da entidade.
O festival servirá tamén como mostra do traballo realizado durante o curso 2025-2026. Sobre o escenario estarán Miguinhas, Faragulliñas, Faragullas, Os Molladiños e As do Curro Vello, formacións que compartirán co público un repertorio no que terán protagonismo a música tradicional, o baile e o espírito festivo dunha xornada pensada para todas as idades.
Desde Faragulla convidan a veciñanza a achegarse a Teixeiro para celebrar xuntos unha data especialmente simbólica para Galicia. A asociación quere converter esta terceira edición nun encontro arredor da lingua, da música e das raíces, mantendo viva a transmisión da tradición entre xeracións.
A entrada será gratuíta e as portas permanecerán abertas ata completar aforo. O festival conta coa organización da Asociación Cultural Faragulla e coa colaboración do Concello de Curtis e da Deputación da Coruña.