A Agrupación Alexandre Bóveda celebra 50 anos de cultura galega cunha gala no Rosalía de Castro
O Teatro Rosalía de Castro acollerá o vindeiro mércores, 1 de xullo, ás 20.00 horas, a gala do 50 aniversario da Agrupación Cultural Alexandre Bóveda, unha das entidades máis activas na defensa da lingua, da memoria e da cultura galega na Coruña. A entrada será libre e de balde ata completar capacidade.
A celebración servirá para conmemorar medio século dunha asociación nacida na cidade o 17 de agosto de 1976, nun contexto no que a defensa do galego e da cultura propia precisaba espazos de resistencia e participación cidadá. Desde entón, a entidade mantivo como obxectivos prioritarios a promoción da lingua e da cultura galegas, así como a divulgación da figura e do pensamento de Alexandre Bóveda.
Na actualidade, a Agrupación Cultural Alexandre Bóveda conta con máis de 400 socias e socios e desenvolve arredor de 200 actividades anuais. Ao longo da súa traxectoria impulsou iniciativas vinculadas ao teatro, á lectura, á radio, á memoria histórica, ao feminismo e á dinamización cultural de base.
Entre os seus proxectos máis coñecidos figuran 'A Coruña das Mulleres', creado para construír de maneira colectiva un fondo documental, gráfico e audiovisual sobre a memoria feminina da cidade, e 'A Coruña Literaria', unha iniciativa que busca poñer en valor a relación da Coruña co libro, a edición e a lectura.
A gala do aniversario terá un formato multidisciplinar. O programa inclúe música de Raúl Galego e Mercedes Peón, humor de Mofa e Befa, poesía na voz de Eva Veiga e propostas escénicas e audiovisuais vinculadas á danza contemporánea e á figura de Maruxa Mallo. O acto estará presentado por Chus Álvarez e conta coa colaboración do Concello da Coruña e doutras entidades culturais.