Cultura

A XIII Exposición, que abre as súas portas este 4 de agosto, incorpora 120 imaxes inéditas e un espazo dedicado á historia do emblemático Globo de Sada

A Casa da Cultura Pintor Lloréns acolle desde este martes, 4 de agosto, a XIII Exposición de Memoria de Sada, unha cita xa consolidada no calendario cultural do municipio que permitirá realizar unha viaxe pola historia local a través de 250 fotografías, das que 120 se amosan por primeira vez ao público.

A mostra poderá visitarse ata o 28 de agosto, de luns a venres, en horario de 8.30 a 14.30 horas, con entrada gratuíta. As imaxes proceden do arquivo creado polo colectivo Memoria de Sada, un proxecto colaborativo que durante máis dunha década recompilou milleiros de fotografías cedidas pola veciñanza para conservar e divulgar o patrimonio gráfico da vila.

Entre as principais novidades desta edición destaca unha sección monográfica dedicada ao Globo de Sada, un dos símbolos máis representativos das festas patronais. A través dunha selección de fotografías históricas, a exposición repasa a evolución desta tradición desde o ano 1955 e recupera escenas que forman parte da memoria colectiva de varias xeracións de sadenses.

Ao longo do percorrido, os visitantes poderán descubrir escenas da vida cotiá, festas populares, paisaxes, oficios, actividades deportivas e momentos destacados da historia do municipio, configurando un retrato da evolución social, cultural e urbana de Sada.

Como recoñecemento ao labor desenvolvido na recuperación e conservación da memoria gráfica local, o colectivo Memoria de Sada será o encargado de pronunciar o pregón das Festas de Sada 2026, que terá lugar o 15 de agosto ás 20.15 horas no escenario do paseo marítimo.

O Concello anima á veciñanza e ás persoas visitantes a achegarse á Casa da Cultura Pintor Lloréns para coñecer unha exposición que, máis alá das fotografías, recupera historias, recordos e emocións que forman parte da identidade do municipio.