Vinte e cinco oleiros e oleiras daranse cita en Santa Cruz na XXXI Feira Alfaroleiros
Santa Cruz converterase un ano máis no epicentro da olería tradicional coa celebración da XXXI Feira Alfaroleiros, que terá lugar do 6 ao 10 de agosto. Organizada polo Concello de Oleiros, a feira reunirá nesta edición a 25 oleiros e oleiras procedentes de distintos puntos da península ibérica, converténdose nun escaparate da diversidade e riqueza desta arte milenaria.
“Alfaroleiros é moito máis que unha mostra de olería”, destacan desde o Concello. A cita é xa un referente cultural que atrae cada verán a centos de visitantes, tanto do municipio como de fóra, interesados en coñecer de preto o traballo artesanal e a tradición cerámica.
Ademais da exposición e venda de pezas únicas, o evento contará cunha ampla programación paralela que incluirá concertos, obradoiros, demostracións en vivo, espectáculos de maxia e propostas gastronómicas vinculadas ao barro.
O Concello anima á veciñanza e visitantes a achegarse a Santa Cruz para desfrutar dun evento que combina cultura, tradición e lecer. Toda a programación pode consultarse en www.oleiros.org.