Vilasantar pon en marcha un programa de promoción da saúde con sesións semanais ata maio de 2026
O Concello de Vilasantar activará entre xaneiro e maio de 2026 un novo ciclo do seu Programa de Promoción da Saúde, unha iniciativa con encontros semanais que abordará cuestións vencelladas ao benestar emocional, a nutrición e o exercicio físico. As sesións desenvolveranse todos os luns ás 11.00 horas e estarán coordinadas pola Rede Galega de Promoción da Saúde (REGAPS) da Dirección Xeral de Saúde Pública, coa colaboración municipal e da Xunta de Galicia.
Segundo o contido do programa, o bloque de benestar emocional inclúe a continuidade do traballo xa iniciado con novas sesións informativas, entre elas unha dedicada á hixiene do sono. No eido da alimentación saudable, prevénse actividades teórico-prácticas centradas en hábitos saudables, o chamado prato de Harvard, a planificación de comidas e a lectura do etiquetado nutricional, ademais de obradoiros orientados a preparar almorzos equilibrados.
A parte de actividade física combinará recomendacións xerais con propostas máis dinámicas, como a experiencia virtual EnMovemento (exercicio mediante realidade virtual) e a iniciativa 'Camiña e conecta', con paseos polo contorno do municipio acompañados de mensaxes saudables.
A programación dá continuidade á liña de traballo iniciada meses atrás no municipio. O Concello xa promoveu este ano un programa de benestar emocional dirixido a maiores de 60 anos, con encontros semanais e inscrición previa, que se desenvolveu no Local Social de Présaras.