Vilasantar celebrou unha nova edición do Día da Bici para promover a vida activa e o contacto coa natureza
O Concello de Vilasantar celebrou unha nova edición do Día da Bici, unha iniciativa coa que se busca fomentar a práctica de actividade física e poñer en valor a riqueza natural do municipio. A cita contou coa participación dunha trintena de persoas, entre elas veciños e veciñas de todas as idades.
O percorrido levounos polas parroquias de Vilasantar, Barbeito e Mezonzo, nun ambiente marcado pola convivencia e o deporte ao aire libre. A comitiva finalizou o traxecto na casa consistorial, onde tivo lugar un sorteo de material deportivo con agasallos como mochilas, camisetas ou cantimploras. Como colofón á xornada, os participantes desfrutaron dunha merenda ofrecida polo Concello.
O alcalde de Vilasantar, Fernando Fernández Pérez, tamén se sumou á actividade e destacou a boa acollida que ten cada ano esta proposta municipal. “É unha actividade que busca fomentar un estilo de vida saudable a través do exercicio físico e a participación social”, afirmou.