Vilasantar acolle a primeira edición do Día da Bici
O Concello de Vilasantar organizou a primeira edición do Día da Bici, á que acudiron 26 ciclistas, na súa maioría menores.
As persoas participantes, que recibiron unha camiseta cun logo deseñado para o evento, percorreron parte das parroquias de Vilasantar e Mezonzo durante unha hora e media.
Tras o paseo en bicicleta, os ciclistas regresaron á casa do concello para participar nun sorteo de material deportivo. Alí, toda a rapazada recibiu un agasallo deportivo co logo do Día da Bici de Vilasantar, podendo elixir entre unha mochila, unha gorra ou unha cantimplora.
O alcalde da localidade, Fernando Fernández Pérez, participou na xornada e salientou o obxectivo de “promover o deporte e un estilo de vida saudable, especialmente entre a rapazada; e aproveitar a fermosa contorna natural do noso municipio”.
Finalmente, os participantes recuperaron forzas cun petisco ofrecido pola administración local na praza do consistorio.