Vilasantar abre o prazo de inscrición para o Campamento de Nadal no CEIP de Présaras
O Concello de Vilasantar ten xa aberto o prazo de inscrición para o Campamento de Nadal, unha proposta de ocio educativo dirixida a nenos e nenas de entre 3 e 12 anos que se desenvolverá do 22 de decembro ao 7 de xaneiro nas instalacións do CEIP de Présaras. O programa contará con diferentes actividades lúdicas e creativas, xogos e obradoiros pensados para favorecer a conciliación das familias durante as vacacións escolares.
O horario do campamento será de 10.00 a 14.00 horas. As follas de inscrición poden presentarse nas dependencias municipais, a través da sede electrónica do Concello ou no propio colexio de Présaras. As prazas asignaranse por rigorosa orde de chegada, tendo preferencia as crianzas empadroadas en Vilasantar; os nenos e nenas doutras localidades poderán participar unicamente no caso de que queden prazas libres.
Desde o Concello lembran que as ausencias inxustificadas poderán supoñer a baixa no servizo se existe lista de agarda, e recomendan que o alumnado acuda cada día con auga e un pequeno aperitivo saudable para tomar a media mañá. O Campamento de Nadal está financiado pola Consellería de Política Social e Igualdade da Xunta de Galicia e polo Ministerio de Igualdade.