Vilarmaior leva ao SEPRONA un vertido ilegal de 42 pneumáticos na zona de Gomil
O Concello de Vilarmaior presentou unha denuncia formal ante o Servizo de Protección da Natureza (SEPRONA) da Garda Civil tras detectar un depósito incontrolado de 42 pneumáticos na área de Gomil. Segundo a administración local, o vertido apareceu nun espazo natural de especial sensibilidade ambiental, polo que supón un dano directo para a paisaxe e un potencial risco para o medio e a saúde pública.
O goberno municipal advirte de que a acumulación deste tipo de residuos pode favorecer a aparición de pragas e, ademais, entraña perigos engadidos en caso de incendio, pola posible emisión de substancias tóxicas.
O alcalde, Carlos Vázquez Quintián, condenou o ocorrido e cualificou os feitos como un ‘acto de absoluta irresponsabilidade e falta de civismo’. O Concello solicitou ao SEPRONA que se realicen investigacións para localizar ás persoas responsables e aplicar as sancións que marque a normativa.
Dende o consistorio lembran que a xestión de pneumáticos usados está regulada e que existen vías legais e puntos autorizados para a súa entrega e tratamento. Por iso, fan un chamamento a veciños e visitantes para que acheguen calquera dato que poida axudar a identificar os autores do vertido ou os vehículos empregados no transporte.
O Concello asegura que, unha vez rematen as primeiras dilixencias, impulsará as tarefas de limpeza e restauración da zona afectada. O comunicado municipal vai acompañado dunha imaxe do depósito localizado.