Eventos

A banda actuará tamén o venres 6 de novembro na Coruña, un día antes do concerto xa anunciado dentro da súa xira 'Gira de vuelta. Canciones de ida'

Vetusta Morla ofrecerá finalmente dous concertos consecutivos no Coliseum da Coruña os días 6 e 7 de novembro, despois de que a boa acollida da primeira data levase á incorporación dunha segunda actuación na cidade. A venda xeral para ambas as citas abriu este xoves 26 de marzo ás 12.00 horas.

A nova actuación, prevista para o venres 6 de novembro, converte a parada coruñesa nunha dobre cita dentro da xira de regreso do grupo, que este ano pasará por sete cidades. Segundo a información oficial da banda, a actuación do sábado 7 aparece xa como esgotada, mentres que a do venres 6 segue dispoñible.

O concerto celebrarase no Coliseum e as entradas parten de 46,30 euros na canle autorizada de venda. A cita da Coruña será ademais a única anunciada en Galicia dentro deste percorrido estatal.

O grupo regresará así á cidade dous anos despois da súa actuación na praia de Riazor como cabeza de cartel do Festival Noroeste Estrella Galicia de 2024, nun novo paso da programación musical prevista este ano no recinto coruñés.