Veciños de Xora, en Coirós, denuncian a falta de liña telefónica e fibra en varias vivendas a pesar da proximidade a puntos de conexión
Varios veciños da zona de Xora trasladaron a súa preocupación pola ausencia dun servizo tan elemental como unha liña de telefonía fixa ou unha conexión a internet mediante fibra óptica. Segundo indican, algunhas vivendas situadas a pé de estrada carecen de calquera tipo de cobertura, nin sequera mediante telefonía convencional, unha situación que, ao seu entender, resulta difícil de xustificar en pleno ano 2025.
As persoas afectadas aseguran que levan tempo solicitando unha solución tanto ás compañías operadoras como ás administracións competentes, sen obter ata agora un resultado positivo. Explican que, tras revisar a zona, comprobaron que a vivenda máis afastada das que presentan este problema sitúase a uns 250 metros dun poste con caixa de conexión de fibra. A pesar desa proximidade, insisten en que non lles foi posible acceder ao servizo nin obter compromisos claros sobre cando podería instalarse.
Os residentes cualifican a situación de 'incomprensible' e lembran que a conectividade é hoxe un servizo esencial para o estudo, o teletraballo ou a simple comunicación diaria. Por este motivo, solicitan que o Concello de Coirós e as compañías correspondentes analicen o caso e impulsen as xestións necesarias para garantir unha solución estable ás vivendas que continúan sen liña.
Engaden que descoñecen se existen máis puntos do municipio con problemas similares e piden que se revisen estas zonas para evitar que outras familias permanezan sen acceso a conexións básicas.