Veciños de Sada alertan do descontrol ambiental en As Brañas e esixen medidas inmediatas ao Concello
Veciños de As Brañas volven esixir ao Concello de Sada actuacións urxentes ante a presenza continuada de verteduras, restos de obra e vehículos aparcados en parcelas que lindan co humidal declarado Espazo Natural de Interese Local (ENIL) Brañas de Sada.
O plan de conservación do ENIL, en tramitación, delimita o ámbito protexido e establece como medidas imprescindibles a vixilancia, a sinalización do perímetro e o control dos usos para preservar a biodiversidade e os procesos ecolóxicos do humidal.
Un veciño que vive ao carón do ENIL denuncia que 'nos últimos meses a situación agravouse coa acumulación de lixo e coa ocupación de terreos por centos de vehículos; hai restos de obra en parcelas contiguas que levan meses sen retirar. Ninguén toma cartas no asunto ou non queren facelo', e pide visibilidade e intervención inmediata das administracións locais.
A veciñanza alerta do risco que supón esta situación para a fauna, a vexetación e a calidade das augas e reclama actuacións concretas e inmediatas: retirada dos residuos, regulación efectiva do estacionamento e instalación de sinalización que delimite claramente o espazo protexido.
O propio Plan de Conservación recolle o réxime de usos e actividades permisibles e remarca a prevalencia da protección ambiental sobre a ordenación urbanística, así como a necesidade de adoptar medidas de restauración e prevención ante actividades que poidan degradar o sitio, polo que os veciños esixen que se cumpra o previsto no documento e que se aclare a titularidade e responsabilidades sobre as parcelas afectadas.
Tamén é salientable que, segundo o plan, a xestión do ENIL require coordinación entre o Concello de Sada, a Xunta e os órganos ambientais competentes, e contempla a participación cidadá nos procesos de conservación, polo que o movemento veciñal pide a apertura de canles de diálogo para planificar actuacións conxuntas e transparentes.
A petición da comunidade inclúe tamén a creación dun calendario de intervencións e un plan de supervisión que impida a repetición destes episodios de abandono, ademais de solicitudes de maior transparencia sobre actuacións en curso. Os veciños lembra que a protección real do humidal pasa pola aplicación efectiva das medidas do plan e pola implicación consensuada das administracións e da poboación local.