Unha unidade móbil do DNI visitará Abegondo o 27 de agosto

Os veciños poderán renovar o documento, o pasaporte e actualizar certificados electrónicos, cun límite de 40 prazas.

O Concello de Abegondo acollerá o mércores 27 de agosto a visita dunha unidade móbil da Policía Nacional destinada á tramitación do Documento Nacional de Identidade e do pasaporte.

Durante esta xornada, as persoas interesadas poderán realizar distintos trámites, como a renovación do DNI, a expedición do pasaporte ou a actualización das claves e certificados electrónicos asociados ao documento.

Para poder acceder ao servizo é preciso inscribirse previamente no propio Concello de Abegondo, xa que só se dispoñen de 40 prazas, que se cubrirán por orde de solicitude.

Esta iniciativa pretende achegar a xestión documental á veciñanza sen necesidade de desprazarse a outras localidades, facilitando así trámites administrativos esenciais.