Unha nova edición do 'Rasca e Gaña' chega a Culleredo con máis de 2.500 premios para impulsar o comercio local
O Concello de Culleredo pon en marcha unha nova edición da xa tradicional campaña de Nadal de apoio ao comercio de proximidade, 'Rasca e Gaña', que este ano repartirá un total de 2.574 premios entre a clientela dos negocios adheridos. A iniciativa desenvolverase entre o 9 de decembro de 2025 e o 5 de xaneiro de 2026, co obxectivo de dinamizar as vendas nun período clave para o sector.
En total, o Concello distribuirá 105.000 boletos entre os comercios participantes. Cada establecemento recibirá 500 unidades, o que garante un mínimo de 12 premios por negocio. Entre os agasallos inclúense unha televisión, varios teléfonos móbiles, sete auriculares, seis smartwatches e numerosos obsequios adicionais. Os premios poderán reclamarse ata o 15 de xaneiro de 2026, de acordo co recollido nas bases, que estarán dispoñibles na páxina web municipal.
O alcalde de Culleredo, José Ramón Rioboo, subliña que esta campaña 'é unha ferramenta eficaz para animar as compras de Nadal e para lembrar que o noso comercio de cercanía ten moito que ofrecer'. Nesa liña, destaca que 'cada compra realizada nun negocio local reverte directamente no municipio e contribúe a manter un tecido económico sólido e sostible'.
Rioboo lembra, ademais, que o 'Rasca e Gaña' 'se converteu nunha cita moi agardada tanto polos comerciantes como pola veciñanza, porque xera ambiente, atrae consumo e premia a quen elixe mercar en Culleredo', reforzando así o compromiso municipal co pequeno comercio como motor económico e social do municipio.