Unha fin de semana de festa, feira e tradición arredor do lacón con grelos en O Mesón do Vento en Ordes
O Mesón do Vento volverá ser punto de encontro para quen busca gastronomía, ambiente de feira e tradición. A localidade acolle os días 7 e 8 de marzo de 2026 a XXVII Festa do Lacón con Grelos, unha cita que mestura o sabor máis clásico coa vida de recinto feiral e un programa cheo de actividade durante toda a fin de semana.
O sábado 7 a xornada arrinca ás 10.00 horas coa apertura do recinto feiral, onde haberá exposición de gando e a I Feira de Maquinaria Agrícola de Segunda Man. Ao mediodía (12.00 horas) está previsto o X Encontro Folclórico con participación de varias asociacións culturais, e a tarde completarase con pasarrúas da Charanga BB+ (14.00 e 19.00 horas), o espectáculo ecuestre 'Duende Ecuestre' (16.30 horas) e o monólogo de Leti da Taberna 'Jastac Japi Jolipais' (18.00 horas). O peche do recinto será ás 20.00 horas.
O domingo 8 manterá o pulso feiral desde as 10.00 horas, con exposición de gando, pasarrúas coa Asociación Cultural Leira Gaiteiros e a feira de maquinaria. A programación incorpora tamén probas e exhibicións arredor do Cabalo Marchador Galego, concurso morfofuncional e unha VII Poxa de Gando de Raza Frisoa, ademais de citas populares como a xincana libre de obstáculos (16.00 horas) e a carreira de burros (17.00 horas).
A música porá banda sonora á tarde coa sesión vermú do Dúo Matices (14.00 horas) e a actuación da orquestra Os Satélites (18.00 horas). Paralelamente, a festa estenderase polos locais da zona coa degustación de lacón con grelos, antes do peche do recinto feiral ás 20.00 horas.
