Unha andaina reivindicativa percorrerá o Monte Xalo para poñer o foco na defensa da auga e do territorio
O Monte Xalo volverá situarse no centro da mobilización ambiental o vindeiro domingo 15 de marzo coa celebración dunha andaina reivindicativa impulsada por ADEGA, a Asociación de Montes Veciñais da Parroquia de Celas e o Colectivo das Pedras Galladas. A proposta busca reunir á veciñanza e ás persoas interesadas na defensa deste espazo para divulgar sobre o propio terreo os seus valores naturais, sociais e culturais.
A actividade arrancará ás 11.00 horas na Pedra Mazafacha, punto de partida dun percorrido no que se ofrecerán explicacións sobre a relevancia ecolóxica, paisaxística e patrimonial do monte. A xornada inclúe tamén un xantar de convivencia e un pequeno acto informativo co que as entidades organizadoras pretenden reforzar a conciencia social arredor dun enclave que consideran clave para a comarca.
A convocatoria enmárcase na continuidade do debate aberto nas últimas semanas sobre o futuro do Monte Xalo. Nese contexto, cobra especial protagonismo a preocupación por determinados proxectos con posible impacto sobre o territorio, entre eles o da central hidroeléctrica reversible prevista na zona de Meirama.
Segundo lembran as entidades convocantes, esa infraestrutura prevé utilizar a balsa mineira da antiga explotación de carbón como parte do sistema. Iso suporía o movemento continuo de grandes volumes de auga cara ao sistema fluvial conectado co encoro de Abegondo-Cecebre, do que depende o abastecemento de auga potábel da cidade da Coruña e da súa área metropolitana.
A andaina tamén recolle o fío da mesa redonda 'O Monte Xalo: Olimpo Ártabro. A auga, a paisaxe e o patrimonio que nos sostén', celebrada recentemente na Coruña, onde se puxo de manifesto o valor ambiental e social deste espazo, así como a necesidade de protexelo fronte a actuacións que poidan comprometer o seu equilibrio.
As persoas interesadas en participar poden consultar a información da xornada e formalizar a súa inscrición a través da páxina web de ADEGA. Ademais, a organización habilitará un autobús con saída desde Lugo para facilitar a asistencia de participantes doutras zonas de Galicia. Desde os colectivos promotores fan un chamamento á participación cidadá para defender un territorio que identifican como paisaxe, memoria e futuro compartido.