Un vertido ilegal no camiño entre a canteira do Quinto Pino e Santa Icía mobiliza ao Concello de Arteixo
Un novo vertido incontrolado de residuos nun camiño rural de Arteixo levou ao Concello a activar aos vixiantes ambientais para avaliar a situación e proceder á súa retirada. O aviso chegou ao goberno local a través dunha veciña, que enviou por mensaxe unha fotografía e a localización do punto onde apareceron os desperdicios.
Segundo informou o Concello, os restos atópanse ao carón do camiño que conecta a canteira do Quinto Pino coa zona de Santa Icía. Tras recibir a denuncia cidadá, os servizos municipais trasladaron o aviso aos vixiantes ambientais, que elaborarán o correspondente informe para tramitar a retirada do material depositado de forma irregular.
Desde o goberno local aproveitaron a incidencia para insistir na importancia da colaboración veciñal para detectar este tipo de prácticas e manter o municipio limpo. 'Cantos máis ollos miren, máis vemos', sinalan desde o Concello dentro da campaña municipal ‘Arteixo Limpo’.
O executivo lembra tamén que existen alternativas para desfacerse de mobles e outros enseres voluminosos sen recorrer a vertidos ilegais. As persoas que non poidan trasladalos ata o punto limpo poden solicitar a súa recollida chamando aos teléfonos 981 65 91 60 ou 981 65 91 61 ou a través do correo lixo@arteixo.org, onde se lles indicará o lugar onde deben deixar os obxectos para que o servizo municipal pase a retiralos. Ademais, o Concello recorda que o punto limpo municipal permanece aberto durante toda a semana.