Educación

O Concello participa xunto con Curtis, Sobrado, Boimorto e Coirós nun recurso de atención temperá que ofrece psicoloxía, logopedia e terapia ocupacional, con apoio tamén para as familias

O Concello de Aranga lembra ás familias do municipio que teñen á súa disposición o Servizo de Atención Temperá, un recurso compartido cos concellos de Curtis, Sobrado, Boimorto e Coirós e orientado á atención de nenos e nenas de entre 0 e 6 anos.

Este servizo céntrase na valoración, diagnóstico e intervención ante posibles dificultades no desenvolvemento infantil, cun enfoque personalizado e adaptado ás necesidades de cada menor. A iniciativa busca actuar de maneira precoz para favorecer a evolución dos pequenos e pequenas, ao tempo que ofrece acompañamento ás familias durante todo o proceso.

A atención estrutúrase en tres grandes áreas. En psicoloxía, o servizo traballa cuestións como a estimulación cognitiva, a xestión emocional, as habilidades sociais, a intervención familiar, o apego seguro e a detección e abordaxe de trastornos do neurodesenvolvemento. No ámbito da logopedia, préstase apoio en problemas de articulación, procesos de deglutición, atraso na fala, trastornos da linguaxe, alteracións da voz e mellora da comunicación. Pola súa banda, a terapia ocupacional céntrase na autonomía nas actividades da vida diaria, na adaptación da contorna, na integración sensorial e no desenvolvemento de destrezas motoras e cognitivas.

O acceso ao servizo realízase mediante derivación do pediatra de cabeceira no caso de menores de 0 a 6 anos. Unha vez iniciado o proceso, a atención pasa por unha fase de acollida coa familia para recoller a demanda e explicar o funcionamento do recurso, unha valoración por parte dos profesionais correspondentes e, se é preciso, o comezo da intervención.

Desde o Concello destacan este programa como un apoio fundamental para detectar de forma temperá posibles dificultades e ofrecer unha resposta especializada nun momento clave do desenvolvemento infantil. As persoas interesadas poden solicitar máis información nos teléfonos 686 09 21 91 e 682 02 14 88 ou no correo electrónico atenciontemperaconcellocurtis@gmail.com.