Un manifesto en María Pita e unhas xornadas sobre innovación centrarán abril arredor do párkinson
Párkinson Galicia-Coruña prepara un mes de abril marcado pola sensibilización social e pola divulgación dos avances arredor do párkinson. A entidade conmemorará o Día Mundial da enfermidade cun acto público na praza de María Pita e completará a programación coas súas VII Xornadas, unha cita que nesta edición terá un significado especial ao coincidir co 30 aniversario da asociación.
A primeira convocatoria será o 11 de abril, ás 11.00 horas, coa lectura do manifesto polo Día Mundial do Párkinson. O acto, aberto á cidadanía, busca reunir representantes políticos, entidades sociais e sanitarias, ademais de familias e persoas que conviven coa enfermidade. A iniciativa pretende dar visibilidade á realidade diaria dos pacientes e reforzar a conciencia social arredor dun problema de saúde que afecta a miles de persoas.
A programación continuará o 17 de abril coas VII Xornadas de Párkinson, que se desenvolverán no Hotel Áttica21 entre as 9.00 e as 14.00 horas e entre as 16.00 e as 18.30 horas. Baixo o lema ‘Innovación con impacto’, o encontro reunirá profesionais dos ámbitos sanitario, científico e tecnolóxico para analizar os avances máis recentes no abordaxe da enfermidade.
O programa porá o foco en cuestións como a investigación neuroprotectora, a estimulación medular, a aplicación da intelixencia artificial e das novas tecnoloxías no diagnóstico e no tratamento, así como na evolución do enfoque clínico e humano do párkinson ao longo das tres últimas décadas. A cita contará con relatorios científicos e mesas redondas nas que participarán investigadoras, neurólogos, enxeñeiras biomédicas, especialistas en innovación e intelixencia artificial e tamén persoas con párkinson.
Con este formato, a asociación busca tender pontes entre a investigación, a práctica clínica e a experiencia real dos pacientes, incorporando distintas visións arredor da enfermidade. A xornada concluirá coa entrega do IV Premio Aloumiño, un recoñecemento á labor destacada en favor das persoas con párkinson.
Tanto a lectura do manifesto como as xornadas serán de acceso libre, aínda que para asistir á cita do 17 de abril será preciso realizar inscrición previa a través do teléfono 981 241 100 ou do correo electrónico info@parkinsongaliciacoruna.org.