Un fogar a poucos pasos do hospital: o programa 'Hogar de Corazones' deu acubillo a máis de 100 familias no último ano
O programa 'Hogar de Corazones' do CHUAC volverá contar este ano co financiamento íntegro da Fundación María José Jove. Trátase dun servizo de aloxamento gratuíto posto en marcha en 2015 para familiares de pacientes da Unidade de Cardiopatías Infantís e que, desde 2024, ampliou o seu alcance para atender tamén a familias con persoas ingresadas noutras unidades do hospital, especialmente nenos.
O convenio foi renovado pola presidenta da Fundación María José Jove, Felipa Jove, e polo presidente do Padroado da Fundación INIBIC e xerente da Área Sanitaria Integrada A Coruña-Cee, Luis Verde, co obxectivo de garantir a continuidade dunha iniciativa pensada para ofrecer descanso e acompañamento a quen vive a hospitalización dun familiar lonxe do seu domicilio habitual.
Durante o ano pasado, o programa permitiu dar acubillo a 113 familias. Arredor da metade procedían de Pontevedra e o resto repartíase entre as outras tres provincias galegas. A estancia media situouse nos 10 días, cunha permanencia máxima de 57 días.
No balance asistencial, a Unidade de Cardiopatías Infantís realizou 90 procedementos, aos que se sumaron 12 xestantes con diagnóstico de cardiopatía fetal e outras dúas mulleres sometidas a diferentes actuacións hospitalarias. Por idades, atendéronse 15 neonatos, 35 lactantes, 40 menores de entre 5 e 15 anos, dous maiores de 15 e as 12 embarazadas. A estas cifras engádense, ademais, preto dunha decena de estancias relacionadas con servizos como Neonatoloxía, a Unidade de Lesionados Medulares e a área de transplantes de adultos en Cardioloxía.
A selección e seguimento das familias beneficiarias realízase a través do Servizo de Traballo Social do Hospital Materno Infantil da Coruña, que tamén presta apoio psicosocial, orientación e xestión de recursos adaptados ás necesidades de cada caso. Tanto a Fundación como a Xerencia da área sanitaria subliñan que a prioridade é reducir o impacto que a hospitalización produce nos nenos e, por extensión, nas súas familias.