Un exalumno volve ás aulas de Arteixo para falar de 'A princesa dourada' nas Xornadas Literarias do CTA
O Centro Tecnolóxico de Arteixo (CTA) celebra este venres, 27 de febreiro, unha nova edición das súas Xornadas Literarias, unha proposta pensada para impulsar o hábito lector, espertar o pensamento crítico e achegar o alumnado á creación literaria galega contemporánea.
O eixo central da xornada será un encontro co escritor Anxo Mouzo Moreira, exalumno do IES de Sabón, que conversará co estudantado arredor da súa novela 'A princesa dourada'. Durante a sesión, o autor compartirá como foi o proceso de escrita, as claves narrativas da obra e a súa visión da literatura como ferramenta para pensar a realidade e promover cambios sociais.
O acto contará tamén coa presenza da recoñecida escritora María Canosa, que apadriña a participación do autor e achegará unha mirada complementaria sobre o panorama literario actual, enriquecendo o diálogo co alumnado.
A actividade desenvolverase no propio Centro Tecnolóxico de Arteixo, en horario de 10.40 a 12.40 horas, coa participación de estudantes de 1º e 2º de Bacharelato, 1º FPB de Cociña e Panadaría, ESA e 2º FPB de Cociña.
No encontro está prevista a asistencia de representantes institucionais do Concello de Arteixo, coa concelleira de Educación, Inés Ramos; a concelleira de Cultura, María Dubra; e o concelleiro de Promoción Económica, Ángel Vázquez, que acompañarán á comunidade educativa nesta cita cultural.
Desde o IES de Sabón e o Concello subliñan o valor deste tipo de iniciativas para reforzar a ligazón da mocidade coa lectura e para crear espazos de contacto directo con autores e autoras que constrúen o presente da cultura galega.