Un encontro en Celas para que a mocidade con esclerose múltiple faga rede
Culleredo acolle este mércores 25 de febreiro na Rectoral de Celas o segundo encontro de persoas novas con esclerose múltiple, unha proposta pensada para crear lazos, sumar apoios e abrir un espazo de convivencia nun ambiente próximo e positivo.
A iniciativa está impulsada pola Asociación Coruñesa de Esclerose Múltiple (ACEM), entidade que traballa para mellorar a calidade de vida das persoas con esta enfermidade e das súas familias, promovendo información e actividades de acompañamento.
A xornada arrincará ás 18.00 horas e, ao longo da tarde, desenvolveranse dinámicas centradas na creatividade, a expresión e o lecer, deseñadas para favorecer a conexión entre as persoas asistentes. O obxectivo é reforzar a comunidade, compartir vivencias e demostrar que tamén hai espazo para divertirse e xerar relacións de amizade.
A participación está aberta a persoas novas con esclerose múltiple que queiran achegarse, coñecer xente nunha situación semellante e sumarse a un plan diferente.