Un cento de mozos e mozas da Coruña pechan o verán con actividades de lecer gratuítas
O Concello da Coruña finaliza o verán con éxito tras a programación de cinco actividades de lecer gratuítas para mozos e mozas de entre 12 e 30 anos. Estas iniciativas inclúen cursos de surf, paddle surf, skate e orientación e supervivencia, todas orientadas a fomentar un lecer saudable e produtivo entre a xente moza.
A concelleira de Benestar Social, Participación e Igualdade, Nereida Canosa, xunto co concelleiro de Deportes, Manuel Vázquez, visitou esta mañá aos participantes no curso de ‘Multiaventura: supervivencia e orientación’ no Monte de San Pedro. Canosa destacou o compromiso do Goberno de Inés Rey coa oferta de actividades para a mocidade, subliñando que “o noso obxectivo é seguir ofrecendo alternativas de lecer saudable á mocidade coruñesa con espazos e programas do seu interese”.
O curso ‘Multiaventura’, dirixido a mozos e mozas de entre 12 e 17 anos, inclúe catro sesións prácticas de orientación e supervivencia. As actividades, que se desenvolven de 10.00 a 11.30 horas, permiten aos participantes aprender técnicas básicas de uso de material de montaña e técnicas de navegación. A xornada final terá lugar o 30 de agosto en Ledoño, cunha sesión práctica adaptada ás idades dos participantes.
Outras actividades destacadas inclúen o ‘Paddle Surf Experience’ na praia de Santa Cristina, dirixido a mozos e mozas de 18 a 30 anos, que se suma ao curso ‘Iniciación ao Paddle Surf’ celebrado para os máis novos. A pasada semana tamén se celebrou un bautismo de surf na praia do Orzán para mozos e mozas de 12 a 17 anos.
O curso de ‘Skate Experience’, que se celebrará os días 29 e 30 de agosto na pista de skate do Parque de Eirís, ofrecerá a oportunidade de probar o skate sen necesidade de traer táboa propia, xa que se facilitará ao alumnado polo profesorado.
Cada unha destas actividades contou con 20 prazas dispoñibles, cunha alta demanda que superou as 300 solicitudes en total. A inscrición realizouse a través da páxina web do Concello, por orde de chegada. Canosa celebrou a resposta positiva da mocidade, evidenciando que a oferta responde aos seus intereses e necesidades.
A concelleira tamén lembrou a existencia dunha rede de Centros Xuvenís pioneira en Galicia, que inclúe espazos autoxestionados como o Remanso e as Naves do Metrosidero, e programas de ocio alternativo como Nocturnia, que tamén gozan de alta demanda.
O Concello continuará traballando na mesma liña para ofrecer máis e mellores alternativas de lecer á mocidade coruñesa.