Tres horas para aprender defensa persoal feminina nun curso gratuíto en Cambre
Cambre acollerá o sábado 28 de febreiro unha nova edición do Seminario Intensivo de Defensa Persoal Feminina, unha actividade práctica e gratuíta dirixida a mulleres da provincia. O obxectivo é traballar técnicas básicas de autoprotección, prevención e resposta ante situacións de risco, co foco posto en gañar confianza e mellorar a seguridade persoal.
A xornada desenvolverase de 10.00 a 13.00 h no Centro Judo Club Cambre, na rúa Wenceslao Fernández Flórez. O curso está enmarcado na cuarta edición deste programa impulsado pola Sección de Deportes da Deputación da Coruña, que se estende entre decembro de 2025 e abril de 2026 por distintos concellos.
Os seminarios están pensados para mulleres de entre 12 e 75 anos empadroadas en calquera concello da provincia, teñen unha duración de tres horas e contan cun máximo de 75 prazas por sesión.
As inscricións poden formalizarse no apartado de deportes da web da Deputación da Coruña ou no propio Concello. Para máis información, tamén está habilitado o teléfono 670 770 004 e o correo info@escuelaHKF.es.