Tres alumnas da UDC gañan o prestixioso hackathon nacional HPECDSSpain
O equipo PixelPixies, composto polas alumnas do Grao en Ciencia e Enxeñería de Datos (GCED) da Universidade da Coruña, Ana Cives Trillo, Inés González Rodríguez e Paula Miragaya López, conseguiu a vitoria na final do prestixioso hackathon nacional HPECDSSpain, organizado pola compañía tecnolóxica Hewlett Packard Enterprise. As tres estudantes superaron a catro equipos finalistas procedentes de universidades de renome como a Universidade de Deusto, a Universidade Francisco de Victoria de Madrid (UFV), a Universidade Loyola de Sevilla e a Universidade de Castela A Mancha (UCLM).
O Tech Challenge nacional, ou HPECDSSpain, é un evento anual que busca descubrir e poñer en valor novos talentos no sector tecnolóxico en España. Neste certame compiten os mellores equipos das universidades españolas, e este ano, as estudantes da Universidade da Coruña destacaron nunha competición que contou con preto de 400 rivais, sendo o seu equipo un dos cinco únicos finalistas desta cuarta edición do hackathon organizado por Hewlett Packard Enterprise.
A final tivo lugar en Madrid, onde as alumnas da UDC afrontaron un maratón de 25 horas ininterrompidas de programación, no que fixeron fronte aos mellores equipos do país. O grupo vencedor, que formou parte da representación da UDC, foi dado a coñecer tras este intenso reto de programación.
Durante o evento, as estudantes estiveron acompañadas polas docentes da Facultade de Informática da Coruña (FIC), Hilda Romero Velo e Paula María Castro Castro, vicedecana de Relacións Institucionais da facultade, quen tamén puxeron en valor o traballo en equipo e a dedicación das alumnas ao longo de todo o proceso.
Esta victoria pon de manifesto o talento e a preparación do alumnado do GCED da UDC, que se consolida como un referente no campo da ciencia e enxeñería de datos a nivel nacional. O éxito do equipo PixelPixies non só reflicte o alto nivel académico da universidade, senón tamén o seu compromiso coa innovación e a formación de futuros profesionais altamente cualificados no sector tecnolóxico.
Este tipo de certames non só impulsan a carreira das estudantes, senón que tamén reforzan a presenza da Universidade da Coruña na vanguardia da formación tecnolóxica en España.