Tras o éxito de Chayanne, o Coliseum acollerá a Myke Towers e Guitarricadelafuente
Tras o rotundo éxito do recente concerto de Chayanne, o Coliseum da Coruña non baixa o ritmo e encara unha nova fin de semana de intensa actividade musical cun cartel que promete dúas noites inesquecibles. O venres 23 e o sábado 24 de maio, o recinto herculino acollerá as actuacións de dous artistas con estilos moi diferentes pero cunha enorme proxección tanto a nivel nacional como internacional: Myke Towers e Guitarricadelafuente.
O primeiro en subir ao escenario será o artista porto riqueño Myke Towers, unha das figuras máis destacadas da música urbana actual. Cunha carreira fulgurante, Towers conseguiu colocarse entre os artistas máis escoitados en España e no mundo, grazas a éxitos que baten récords e unha conexión especial co seu público. O seu regreso a Galicia, único concerto nesta comunidade dentro da súa xira europea, confirma esa complicidade. A cita co público galego será o venres, nun Coliseum que xa colgou o cartel de “non hai entradas”. O artista chega á Coruña tras un ano de éxitos, que inclúe o recoñecemento de tres premios en galas internacionais de prestixio, e dentro dunha xira que o levará por cidades como Londres, París, Zurich, Madrid, Barcelona e Sevilla.
O sábado 24 será a quenda de Guitarricadelafuente, nome artístico de Álvaro Lafuente, quen tamén elixiu A Coruña como única parada galega da súa nova xira. Esta nova etapa do artista vén acompañada do lanzamento dun novo álbum e dunha posta en escena renovada, pensada para ofrecer unha experiencia íntima e coidada. O seu concerto no Coliseum combinará temas inéditos coas cancións que o deron a coñecer e que conquistaron ao público cun estilo propio, que bebe do folclore, do pop e da experimentación sonora.
A programación do Coliseum confirma así o seu papel como epicentro da música en directo en Galicia, ofrecendo espazo tanto ás grandes estrelas internacionais como ás propostas máis persoais e innovadoras do panorama estatal.