Teixeiro celebra a Feira do Comercio Local cunha fin de semana de actividades, música e premios
Teixeiro prepárase para vivir unha nova edición da Feira do Comercio Local, unha iniciativa que encherá as rúas de ambiente, actividade e música esta fin de semana, os días 25 e 26 de outubro de 2025. A proposta, organizada pola Asociación do Comercio de Teixeiro, ten como obxectivo apoiar o tecido comercial local e ofrecer unha programación de lecer para todas as idades.
A feira abrirá o sábado ás 12.00 h cun pregón a cargo de Bernardo Fernández Piñeiro, deputado e voceiro do Goberno da Deputación da Coruña. Pola tarde haberá espectáculo de maxia co Mago Rufus (16.30–17.30 h) e, a continuación, un obradoiro de maquillaxe 'terrorífico' acompañado pola animación musical da Charanga TNT (17.30–19.30 h). A música continuará durante toda a xornada con sesións de DJ Señor Magick.
O domingo a programación retomarase ás 11.00 h coa apertura da feira e continuará cun showcooking entre as 12.30 e as 14.30 h. A demostración culinaria correrá a cargo de Lolo Mosteiro e Paula Martínez, da Artesa da Moza Crecha, e incluirá degustación gratuíta para o público asistente. Xa pola tarde, entre as 18.00 e as 20.00 h, actuarán en directo os Versionettes, que poñerán banda sonora ao peche da feira. No descanso ás 19.00 h celebrarase o sorteo dun vale de 1.000 euros para gastar nos comercios asociados e anunciaranse as persoas gañadoras do concurso de tapas.
Durante os dous días haberá servizo de barra e de comida, con zonas habilitadas para xantar, e un espazo infantil con inchables, carrusel, xogos e outras atraccións dispoñible ata as 19.00 h. A organización destaca que a feira é unha oportunidade para mercar no comercio de proximidade, gozar en familia e reforzar o sentimento de comunidade: 'Celebramos o noso comercio e celebramos á nosa xente'.