Teixeiro acollerá o VI Torneo Solidario de bádminton polo Nadal 2025
O Pavillón de Teixeiro (Curtis) converterase o vindeiro 20 de decembro no escenario do VI Torneo Solidario Teixeiro Nadal 2025 de bádminton, unha xornada deportiva con carácter festivo e benéfico impulsada polo Club Deportivo Hydra Teixeiro.
A competición arrancará ás 10.00 horas e prolongarase ata a finalización das probas. A inscrición formalizarase mediante a entrega de 1 quilo de alimentos non perecedoiros, que se destinarán á Cáritas parroquial. A organización lembra que a doazón se recollerá na entrada do pavillón o propio día do evento.
O torneo está aberto a todo tipo de participantes, teñan ou non experiencia previa no bádminton, e contará con categorías por idade e nivel. Pola mañá disputarase o torneo e, xa pola tarde, haberá retos de dobres para completar a xornada.
As persoas interesadas poden inscribirse ata o 15 de decembro a través do correo cdhydra@gmail.com ou no teléfono 640 76 30 80 (Javier). As prazas son limitadas e asignaranse por orde de inscrición. Ademais, quen non dispoña de raqueta poderá solicitala, xa que o club facilitará material para participar.