Susana Guimarey interpón unha querela criminal contra Alternativa dos Veciños

A exconcelleira de Carral acusa ao partido de difamación e de empregar o seu nome para danar a súa imaxe pública

A exedil de Carral, Susana Guimarey García, anunciou a presentación dunha demanda criminal contra Alternativa dos Veciños e contra quen resulte responsable das acusacións que asegura estar a sufrir.

Segundo explicou, hai medio ano deixou todas as súas responsabilidades no Concello, abandonou a formación política, entregou a súa acta e regresou á súa actividade profesional, desvinculándose de calquera cargo institucional. 'Xa non son unha figura pública e, con todo, seguen obsesionados comigo', afirmou.

Guimarey denuncia que se está a empregar a súa imaxe 'con fins de desprestixio', a través de acusacións que cualifica de falsas, baseadas en insultos, coaccións e malas formas, que afectan tanto á súa persoa como ao seu ámbito familiar.

A exconcelleira insiste en que non tolerará máis difamacións e que defenderá a súa honra pola vía xudicial. 'Non estou en venda nin o estiven nunca; non preciso que ningún partido me busque traballo nin me favoreza', subliñou. Coa querela presentada, Guimarey asegura que esgotará todas as ferramentas legais para salvagardar a súa reputación.