Seis lebres marcarán o ritmo na C10 da Coruña con referencias de 37 a 55 minutos
A C10 entra na recta final cara ao domingo 5 de outubro coa confirmación de seis lebres que axudarán ás e aos participantes a cumprir obxectivos de marca. O concelleiro de Deportes, Manuel Vázquez, avanzou que a proba —que acada a súa XIX edición— contará con referencias de tempo en meta de 37, 40, 45, 50 e 55 minutos, nun dispositivo pensado para ordenar ritmos e facilitar cronos persoais.
Os encargados de tirar de cada grupo serán Borja Costa, que marcará os 37’ (ritmo aproximado de 3’42”/km); Lucas Prada, aos 40’ (4’00”/km); Lara Solsona, aos 45’ (4’30”/km); e Cristina Alayón, aos 50’ (5’00”/km). O grupo de 55’ (5’30”/km) irá acompañado por dúas lebres, Daniel Blanco e Gabriel Pizarro. Todas e todos correrán fóra de clasificación, mais levarán dorsal e unha bandeira identificativa co obxectivo de tempo para que as persoas corredoras poidan seguir a súa referencia con claridade.
“Estas lebres son claves para quen quere cruzar a meta cumprindo un propósito”, salientou Vázquez, que agradeceu a implicación de Borja, Lucas, Lara, Cristina, Daniel e Gabriel, así como o apoio da marca coruñesa The Cobardes a esta iniciativa. O edil lembrou ademais que o prazo de inscrición permanece aberto ata o domingo 28, último día para formalizar a participación, e que toda a información práctica pode consultarse na web de Carreiras Galegas.
Co dispositivo de ritmos confirmado e máis de 3.000 dorsais xa asignados, a C10 perfílase como unha festa do running popular na cidade herculina, cun percorrido rápido e pensado para bater marcas persoais.