Segunda manifestación en Cortiñán contra o novo trazado ferroviario que elimina o baipás de Infesta
O Concello de Bergondo e as persoas residentes afectadas volveron expresar hoxe o seu rexeitamento rotundo ao proxecto do Ministerio de Transportes para o ramal de conexión entre as liñas León–A Coruña e Betanzos–Infesta–Ferrol. Segundo advirte a administración local, a actuación, que implica a eliminación do baipás de Infesta, suporía un impacto inasumible sobre a parroquia de Cortiñán.
A concentración, celebrada esta tarde, reuniu veciños e veciñas das zonas afectadas e representantes de todos os grupos políticos municipais excepto o BNG. Durante a protesta, as persoas participantes cortaron de novo, de maneira puntual, a estrada provincial DP-0105 tras unha pancarta coa mensaxe 'Por unha alternativa xusta. Cortiñán non se mutila', facendo visible así a súa frontal oposición ao trazado proposto polo Goberno central.
Ao longo do acto, subliñouse de novo a unidade entre o Concello e a cidadanía na defensa dunha solución máis sensata, máis económica e máis respectuosa co territorio. O goberno local lembrou que non se opón á mellora das comunicacións ferroviarias, pero insistiu en que o proxecto actual non achega ningún beneficio real nin para Cortiñán nin para Bergondo e que se xustifica unicamente nun suposto aforro de seis minutos de viaxe, mentres segue sen abordarse con rigor cal debe ser o futuro do transporte cara a Ferrol.
O Concello recordou tamén que xa presentou un recurso formal ante o Ministerio tras o rexeitamento estatal á proposta municipal coñecida como Alternativa 5S, deseñada para afastar o trazado das vivendas, reducir o número de expropiacións e minimizar o impacto social e urbanístico. Pola contra, a alternativa defendida polo Estado, a denominada Alternativa 6, deixaría numerosas casas atrapadas na zona de servidume ferroviaria, devaluaría propiedades e condicionaría gravemente o desenvolvemento urbanístico dunha área xa consolidada. Segundo o executivo local, esta situación non é lóxica, nin humana, nin politicamente aceptábel.
A proposta que defende Bergondo, a Alternativa 5S, reformula trazados xa estudados para simplificar a execución, reducir de maneira notable a necesidade de viadutos e trasladar a intervención a zonas industriais ou forestais, evitando afeccións directas sobre os fogares. Desde o Concello insístese en que se trata dunha opción máis sensata, máis económica e máis xusta, tanto polo menor custo que supón como pola maior protección ás persoas afectadas e ao conxunto do territorio bergondés.