Medio ambiente

A Xunta confirma que o aviso activo no litoral coruñés prolóngase este venres e estenderase ao longo do día ao resto da costa galega, con ondas de ata seis metros

A alerta laranxa por temporal costeiro continúa activa este venres 16 de xaneiro no litoral da provincia da Coruña, especialmente na franxa noroeste e oeste, e ampliarase co paso das horas ao conxunto do litoral galego. Así o comunicou a Xunta a través do 112, citando as previsións da Aemet e a evolución dun episodio que deixa mar combinada do noroeste con ondas de ata seis metros.

Na área da Coruña, o aviso afecta de cheo aos concellos costeiros nos que se recomenda extremar as precaucións, así como ás zonas máis expostas as rías. A previsión é de xornada inestable, con ceos cubertos e chuvascos, nun escenario de mar moi alterada que fai perigoso achegarse á primeira liña de costa.

A Xunta insiste en manterse afastado de diques, rompentes e paseos marítimos, revisar cabos e amarres das embarcacións e evitar actividades no mar. Ademais, comunicou a suspensión da actividade deportiva marítima, tanto federada como do programa Xogade, nos concellos afectados polo aviso.

Na xornada do xoves, o temporal xa levou a peches preventivos de praias e parques na cidade da Coruña, nun contexto de vento e forte oleaxe, e os servizos de emerxencias mantiveron a recomendación de reducir desprazamentos innecesarios e asegurar obxectos soltos en exteriores.