Política | Infraestructuras

O Concello celebra a confirmación da titularidade pública do Pazo e reclama a súa apertura plena á cidadanía como espazo de memoria e de recoñecemento a Emilia Pardo Bazán

Imaxe de Noelia Uceira

O Concello de Sada fixou este 12 de marzo a súa posición tras coñecerse a resolución definitiva sobre o Pazo de Meirás: o inmoble debe consolidarse como un espazo público, aberto á cidadanía e vencellado á memoria democrática. Para o goberno local, o máis relevante da sentenza é que confirma de maneira firme que o pazo e as súas fincas forman parte do patrimonio público, pechando así un longo conflito sobre a súa propiedade.

Desde o executivo sadense subliñan que a decisión supón un paso clave na recuperación institucional e simbólica de Meirás. O Concello entende que o inmoble nunca debeu quedar fóra do patrimonio colectivo e considera que o fallo coñecido hoxe reforza unha reivindicación histórica mantida durante anos desde Sada.

A administración local tamén puxo o foco nun dos aspectos que segue aberto, o da liquidación posesoria. Neste punto, lembra que xa advertira no seu momento da importancia de fundamentar a demanda estatal tamén na posesión de mala fe por parte da familia Franco. Segundo sostén o Concello, esa liña argumental, defendida nun voto particular presentado en 2018, podería ter influído no resultado económico final do proceso.

Con todo, o goberno municipal insiste en que o esencial queda xa asentado: Meirás é patrimonio público. Por iso, avanza que seguirá defendendo a solución máis favorable para o interese xeral cando se determine a contía da liquidación.

Máis alá do plano xudicial, o Concello reclama agora pasos inmediatos para facer efectivo ese carácter público. Entre eles, sinala a necesidade de completar o cambio de titularidade rexistral, que aínda figura a nome da familia Franco, e de impulsar as actuacións precisas para que o espazo poida abrirse de forma plena e digna á veciñanza e ao conxunto da sociedade.

O executivo local tamén insta a activar de maneira real a colaboración entre Estado, Xunta e Concello. O obxectivo, segundo defende, debe ser converter o Pazo de Meirás nun referente de memoria democrática, sen deixar de lado o vínculo do lugar coa figura de Emilia Pardo Bazán e co seu legado cultural.

Para Sada, o momento actual transcende o estritamente xurídico. O Concello interpreta o desenlace como unha vitoria democrática e moral, froito dun traballo sostido no tempo no que sitúa como pezas fundamentais a investigación histórica, o labor xurídico e a presión exercida polo movemento memorialista galego. Nesa liña, o alcalde, Benito Portela, aposta por que Meirás chegue a ser unha 'referencia mundial da dignidade democrática'.