Sada celebra unha nova Feira do Comercio Local nas Festas de Agosto 2025
O Concello de Sada ultima os preparativos para unha nova edición da Feira do Comercio Local, unha cita xa consolidada no calendario das Festas de Agosto, que este ano se celebrará os días 9 e 10 de agosto. O evento terá lugar no Paseo Marítimo, á altura do histórico edificio da Terraza, onde se habilitarán 10 postos de venda para negocios locais que amosarán a súa oferta ao público.
O obxectivo desta feira é impulsar a economía do municipio, visibilizar o comercio de proximidade e ofrecer unha alternativa atractiva para veciñanza e visitantes. O Concello destaca que esta iniciativa tamén funciona como punto de encontro turístico, xa que coincide coas festas patronais, unha das datas con maior afluencia de xente á vila.
A feira abrirá ao público o sábado 9 entre as 11.00 e as 22.00 horas, mentres que o domingo 10 o horario será de 11.00 a 21.00 horas. Cada posto contará cunha carpa de 3x3 metros con electricidade, mesa e cadeiras, co fin de facilitar a exposición de produtos e mellorar a experiencia tanto para comerciantes coma para visitantes. Ademais, o Concello instalará un servizo de vixilancia nocturna que estará activo desde as 22.00 horas do sábado ata a mañá do domingo, garantindo así a seguridade das instalacións e do material exposto.
Segundo sinalan desde a Concellería de Promoción Económica, a feira representa unha oportunidade para que o comercio local gañe visibilidade e estableza contacto directo coa veciñanza e co público visitante. A organización lembra que esta actividade tamén fomenta a dinamización do paseo marítimo, que durante eses días se converte nun espazo cheo de vida, cunha oferta comercial que complementa á programación lúdica e cultural das festas.