Sada celebra o Samaín cunha xincana polos comercios, o V Concurso de Escaparates de Medo e o espectáculo familiar 'Akelarre Chispúm'
O Concello de Sada, en colaboración co comercio local, organiza un programa especial para celebrar o Samaín e dinamizar as rúas do municipio. As propostas inclúen unha xincana familiar polos establecementos participantes, o V Concurso de Escaparates de Medo e o espectáculo infantil 'Akelarre Chispúm'.
A xincana celebrarase o 31 de outubro e consistirá nun percorrido polos comercios colaboradores. As persoas participantes, que deberán ir disfrazadas, terán que completar unha tarxeta con 9 selos visitando os locais. A actividade está pensada sobre todo para nenos, nenas e familias. As tarxetas poderán recollerse na carpa da Praza de España o día 31 a partir das 16.00 h, ou no Edificio Administrativo do Concello entre o 28 e o 31 de outubro. Unha vez cubertas, poderán entregarse na carpa para participar no sorteo previsto ás 20.00 h.
En paralelo desenvólvese o V Concurso de Escaparates de Medo, aberto a todos os negocios de Sada con escaparate visible desde a rúa. Os comercios decorarán con temática de Samaín e manterán as montaxes entre o 27 de outubro e o 1 de novembro. O xurado concederá tres premios: 200 euros, 150 euros e 100 euros. Valorarase a orixinalidade, a posta en escena e a presenza de elementos tradicionais como cabazas, castañas, Santa Compaña, morcegos ou arañas.
Ademais, a Concellería de Cultura programa o venres 31 de outubro ás 12.00 horas, no Auditorio da Casa da Cultura, o espectáculo participativo con animación musical 'Akelarre Chispúm', dirixido por Marian Rei e protagonizado por Ángela Roca e Oskar Gáez (Cía. Teatro Calavera). A entrada é libre ata completar aforo e a idade recomendada é a partir de 4 anos. A obra conta a historia da bruxa Morgana e do seu corvo Cru, que preparan unha festa de Samaín chea de retos e humor para o público máis pequeno.
Con este programa, o Concello busca apoiar o comercio local, ofrecer actividades en familia e encher Sada de ambiente de Samaín.