Sada aposta pola formación xuvenil cun novo curso de monitor/a de tempo libre
Sada volve poñer o foco na formación como ferramenta de futuro. A través da Concellería de Deportes, Educación e Xuventude, o Concello vén de abrir a inscrición nun novo curso de monitor/a de actividades de tempo libre, unha proposta que busca ofrecer oportunidades laborais a persoas interesadas no ámbito educativo e sociocultural.
A iniciativa está dirixida a maiores de idade con titulación académica básica e permitirá ao alumnado adquirir recursos para organizar, dinamizar e avaliar actividades destinadas á infancia, á mocidade, ás persoas maiores ou a colectivos con necesidades especiais. O programa inclúe contidos vinculados á psicoloxía, ás dinámicas de grupo, aos xogos, á educación ambiental, á saúde ou á lexislación.
A formación combinará unha parte teórico-práctica con outra de prácticas, co obxectivo de que os participantes non só adquiran coñecementos, senón tamén experiencia directa no desenvolvemento de actividades de lecer. Unha vez superado o itinerario, o alumnado poderá solicitar a titulación oficial á Xunta de Galicia.
O prazo para presentar solicitudes permanecerá aberto ata o 20 de marzo a través do formulario habilitado na web municipal. As prazas son limitadas e terán preferencia as persoas empadroadas en Sada. O prezo do curso é de 125 euros.
Con esta convocatoria, o Concello reforza a súa aposta por unha formación útil e con saída, pensada para abrir portas nun sector moi vinculado ao traballo con persoas e á educación no tempo libre.