Sada acolle unha nova edición de 'Encontros no Solpor' con música e baile tradicional
Sada prepárase para vivir unha nova noite de folclore co espectáculo 'Encontros no Solpor 2025', unha cita dedicada á música e ao baile tradicional galego organizada pola Asociación Musical Nova Troula. O encontro terá lugar o sábado 29 de novembro, ás 20.00 horas, na Casa da Cultura Pintor Lloréns, con entrada de balde ata completar aforo.
O programa deste ano contará coa participación do GIT Sementeira de Cambre, grupo especializado en instrumentos tradicionais; da Asociación Cultural O Amanexo, que achegará ao escenario pezas de baile e canto de raíz; e da propia Asociación Musical Nova Troula, anfitrioa do evento. Entre todos ofrecerán un percorrido pola música de gaita, percusión, canto e danzas que forman parte do patrimonio inmaterial galego.
'Encontros no Solpor' naceu co obxectivo de crear un espazo de intercambio entre agrupacións e de achegar o folclore ao público familiar, combinando a posta en valor da tradición coa participación da mocidade. Desde Nova Troula destacan que o festival é tamén unha oportunidade para que veciñanza e visitantes gocen dunha velada de convivencia arredor da cultura popular.
O Concello de Sada e a Deputación da Coruña colaboran nesta iniciativa, que se integra na programación cultural de outono e reforza a aposta do municipio polas actividades en galego e polo apoio ao tecido asociativo local.