Rueda sitúa as municipais de 2027 como o seguinte gran reto e pide ao PP gañar máis alcaldías na provincia
O presidente do PPdeG, Alfonso Rueda, puxo este luns, 16 de marzo, o foco nas eleccións municipais de 2027 e apelou ao partido a ampliar o seu peso institucional na provincia da Coruña. Fíxoo durante a Xunta Directiva Provincial celebrada na Coruña, na que tamén participaron o presidente provincial dos populares, Diego Calvo, e a secretaria xeral do partido, Paula Prado.
Na súa intervención, Rueda defendeu que o Partido Popular representa 'a única alternativa' de goberno pola súa capacidade de ofrecer 'xestión e estabilidade', e animou á organización a traballar para gañar máis concellos e sumar máis alcaldías no próximo ciclo electoral. O líder dos populares galegos presentou ese obxectivo como unha prolongación do proxecto político do partido a nivel local e como un reto que, segundo sinalou, hai que construír día a día.
Rueda aproveitou tamén o encontro para reivindicar a acción do Goberno galego e citar algunhas das iniciativas que, ao seu xuízo, marcan a diferenza na xestión da Xunta. Entre elas, destacou a gratuidade da educación, o impulso á vivenda pública e os avances no ámbito sanitario, con proxectos que definiu como pioneiros.
Ao mesmo tempo, contrapuxo esa liña de actuación coa situación política estatal e cargou contra o Goberno de Pedro Sánchez e os seus socios. O presidente do PPdeG criticou o papel do PSdeG e do nacionalismo galego, aos que acusou de actuar máis pendentes da confrontación política ca da defensa dos intereses de Galicia.
Pola súa banda, Diego Calvo incidiu na importancia do momento político actual e asegurou que o obxectivo do PP na provincia é gañar 'con claridade' as próximas eleccións municipais. O presidente provincial puxo en valor o reforzo das estruturas internas e dos equipos locais, ao tempo que apelou á necesidade de manter unha escoita activa da cidadanía e unha presenza constante en cada municipio.
Nesa liña, Calvo destacou o papel dos congresos locais que se están a desenvolver en distintos concellos da provincia e considerou que ese traballo organizativo será clave para chegar en mellores condicións á próxima cita coas urnas. Segundo indicou, contar con bos equipos municipais segue a ser unha das bases fundamentais para consolidar resultados electorais.