Sucesos

A entidade, con base na parroquia de Crendes (Abegondo), pide colaboración veciñal por se alguén viu algo durante a noite

O Xuventude Crendes CF denunciou que na pasada noite sufriu un roubo no local onde o club garda boa parte do material deportivo e as equipacións. Ese espazo era, ademais, fundamental para o funcionamento diario da entidade, xa que tamén se utilizaba como lavandería para lavar e secar a roupa empregada nos adestramentos e nos partidos.

Segundo trasladou a directiva, os ladróns levaron tanto material deportivo e persoal como os electrodomésticos cos que contaban para manter ese servizo de lavado e secado. A perda supón un golpe para un club modesto, que depende en gran medida do traballo voluntario e dunha organización moi axustada para cumprir coa actividade semanal das distintas categorías.

Desde a entidade condenan o ocorrido e piden colaboración á veciñanza por se alguén viu movementos estraños ou pode achegar calquera dato que axude a esclarecer os feitos. O club agradece de antemán calquera información e anima a poñerse en contacto con eles para facilitar a recuperación do material e minimizar o impacto no día a día deportivo.