Rosa Ana García reivindica no CEI o papel estratéxico do audiovisual galego na XIX edición do I+P
A deputada provincial de Emprego, Industria e Medio Ambiente, Rosa Ana García, inaugurou esta mañá no Coruña Estudio Inmersivo (CEI) a XIX edición de I+P, Ideas para Producir, o foro profesional organizado polo Clúster Audiovisual Galego que se consolidou como unha das citas de referencia para o sector a nivel estatal.
O encontro reúne na Coruña a produtoras, creadoras e responsables de contidos das principais plataformas e televisións españolas, que participan na xornada de pitching para coñecer e avaliar 18 proxectos de cinema e televisión elixidos entre preto de 200 propostas presentadas nesta edición. O obxectivo é facilitar acordos de venda, financiamento, distribución e coprodución, ao tempo que se promove a diversidade cultural e lingüística e se reforza a colaboración entre empresas e territorios.
No acto de apertura, García subliñou que a celebración do I+P no CEI 'confirma a vontade da Deputación da Coruña de situar Galicia como un territorio competitivo para o audiovisual, un sector emerxente con gran potencial de creación de emprego cualificado e de proxección exterior'. A deputada insistiu en que o compromiso da institución provincial é 'firme e crecente', ao considerar que o audiovisual é unha industria estratéxica para o futuro da provincia e para o desenvolvemento do talento galego.
O Coruña Estudio Inmersivo, impulsado pola Deputación e xestionado por Pedralonga Estudios, é o maior plató de produción virtual de España e un dos máis avanzados de Europa. Conta cun estudo duns 750 metros cadrados equipado cun muro de pantallas LED de última xeración e sistemas de rodaxe inmersiva que permiten recrear escenarios virtuais en tempo real, nun complexo situado na Cidade das TIC da Coruña.
A xornada de hoxe céntrase na presentación dos proxectos participantes, que dispoñen dun tempo limitado para defender as súas propostas diante de responsables de canles e plataformas. Pola tarde desenvólvense encontros profesionais individualizados entre produtoras galegas e estatais e representantes de empresas como RTVE, Atresmedia, Mediaset España, Movistar Plus+, Amazon Prime Video, HBO Max, Disney+, AMC Networks, Warner Bros. Discovery, Aragón TV, 3Cat ou compañías distribuidoras e produtoras como Filmax, A Contracorriente Films, DeAPlaneta, Treeline Distribution ou Portocabo, entre outras.
Desde a Deputación da Coruña destacan que a combinación dun foro de proxectos como o I+P co potencial tecnolóxico do CEI supón unha oportunidade para atraer rodaxes, consolidar Galicia como polo audiovisual e abrir novas vías de negocio para as empresas do sector, especialmente as de base galega.