Asociacións

A entidade, presentada por Óscar Andrade e Marcos Martínez, traslada propostas como unha senda fluvial polo Valiñas, actuacións en vías autonómicas e a retirada de cableado aéreo

O alcalde de Culleredo, José Ramón Rioboo, mantivo na Casa do Concello unha primeira reunión coa nova asociación O Val de Culleredo, representada por Óscar Andrade e Marcos Martínez. O encontro serviu como toma de contacto e presentación dunha entidade que nace (segundo explicou) coa vontade de actuar como punto de unión entre as parroquias do val, promovendo iniciativas e canalizando demandas veciñais.

Rioboo felicitou os impulsores polo paso dado e amosou ‘total disposición’ a traballar de maneira coordinada. O rexedor subliñou que o asociacionismo veciñal é unha peza fundamental para axustar as actuacións municipais ás necesidades do territorio e agradeceu a implicación da entidade para mellorar ‘unha contorna rural única que debemos coidar’.

Durante a xuntanza, a asociación puxo enriba da mesa un listado de propostas que o Concello estudará. Entre elas, destaca a creación dunha senda fluvial xunto ao río Valiñas para poñer en valor o seu contorno natural, así como o arranxo da estrada que vai desde Rumbo ata a zona do novo colexio.

O Val de Culleredo tamén trasladou reivindicacións vinculadas á rede viaria da Xunta. Entre as peticións figura a execución de beirarrúas ou sendas na AC-400 no tramo entre Sésamo e Celas, unha demanda reiterada na zona. Ademais, solicitan itinerarios peonís desde Ledoño ata a AC-400 e cambios na sinalización da nova rotonda, ao considerar que falta a referencia a ‘Sésamo’ na cartelería instalada pola AXI.

A entidade engadiu outras preocupacións veciñais, como a eliminación de posibles asentamentos ilegais en parcelas rústicas e a retirada do cableado aéreo para mellorar a estética, reforzar a seguridade e garantir un servizo máis fiable. No eido social, indicaron que están a preparar actividades ao aire libre dirixidas á cativada e propuxeron un plan conxunto de concienciación para evitar o depósito de residuos no val, promovendo o uso dos puntos limpos. No seu funcionamento diario, a asociación tamén pediu dispoñer dun espazo onde poder desenvolver as súas iniciativas.