Retiran máis de corenta carabelas portuguesas na praia de Sabón

Socorristas de Arteixo actúan tamén en Barrañán e Combouzas para garantir a seguridade ante a presenza desta especie perigosa

O Concello de Arteixo advertiu da presenza de carabelas portuguesas nas súas praias, unha especie mariña cuxo contacto pode causar picaduras moi dolorosas, acompañadas de enroxecemento, inflamación e, nalgúns casos, mareos ou dificultade para respirar.

O persoal de salvamento retirou arredor de 40 exemplares na praia de Sabón, e tamén realizou intervencións en Barrañán e Combouzas, aínda que en menor número. As autoridades lembran que é fundamental evitar o contacto con estes organismos, mesmo cando parecen mortos, e seguir sempre as indicacións dos socorristas.

En caso de bandeira vermella, o baño permanece totalmente prohibido. O Concello fai un chamamento á colaboración cidadá para manter as praias seguras e libres deste perigo.