Medio ambiente

O Concello izou a bandeira amarela en Santa Cristina, Bastiagueiro e Espiñeiro tras a aparición das carabelas portuguesas

O Concello de Oleiros retirou esta mañá un total de 59 carabelas portuguesas que apareceron nas praias de Santa Cristina, Bastiagueiro e Espiñeiro. Como medida de precaución, izouse a bandeira amarela nestes tres areais, alertando aos bañistas para que extremen a súa cautela.

Ademais, estase a informar da situación a través da megafonía das praias, subliñando a importancia de non tocar estas medusas, xa que as súas picaduras poden ser moi dolorosas. No caso de contacto cutáneo, recoméndase que as persoas afectadas acudan de inmediato ao posto de socorrismo para recibir atención adecuada. A situación continuará a ser monitorizada para garantir a seguridade dos usuarios das praias.