Restricións de tráfico pola obra de abastecemento da Costa da Tapia, en Cambre
O Concello de Cambre informou da planificación de obras previstas para os vindeiros días no marco da actuación de abastecemento da Costa da Tapia, que implicará cambios puntuais na circulación e no estacionamento segundo avance o calendario de traballos.
Para o martes 27 e o mércores 28 de xaneiro, as intervencións centraranse na glorieta. Durante esas xornadas quedará prohibido o cambio de sentido en ambos sentidos, aínda que se manterá o xiro á esquerda en dirección Cambre.
O xoves 29 de xaneiro os traballos trasladaranse ao cruce da rúa Teresa Herrera coa vía principal. Nese punto habilitarase un corte de tráfico, agás para residentes, e o desvío do tránsito realizarase pola rúa Luis Seoane. Ademais, ocuparase o estacionamento comprendido entre os números 23 e 19, mentres que as prazas anteriores quedarán xa habilitadas.
Por último, o venres 30 de xaneiro está previsto o inicio das actuacións na zona de estacionamento entre os números 23 e 19. Desde o Concello piden desculpas polas molestias e solicitan á veciñanza que preste atención á sinalización provisional.