Repártense os novos colectores marróns polas parroquias de Oleiros porta por porta
O Concello de Oleiros traslada que o Consorcio das Mariñas está a instalar os novos colectores marróns en todas as parroquias do municipio. Actualmente, está a repartirse, porta por porta en diversos núcleos onde xa se instalaron os colectores, o material necesario para a separación dos biorresiduos nos fogares. Este material inclúe un caldeiro marrón de 10 litros, bolsas biodegradables, folletos informativos e a tarxeta de acceso ao colector, que será indispensable a partir do 15 de marzo para poder abrilo e depositar os residuos.
A implantación dos colectores realizarase de xeito progresivo, co obxectivo de acadar os 300 colectores operativos canto antes. Con este novo sistema, búscase mellorar a calidade dos residuos orgánicos e avanzar cara a unha xestión máis sostible.
Desde o Concello de Oleiros infórmase que, unha vez rematado o reparto porta a porta, o material (caldeiro, tarxetas de acceso e bolsas) estará dispoñible na Nave de Servizos Municipais (rúa Río) para que os veciños e veciñas poidan recollelo no caso de que non lles chegase á súa vivenda. Para máis información, pódese chamar ao teléfono 981 784 704, escribir ao correo info@consorcioam.org ou cubrir a solicitude do material en https://consorcioam.rsu.gal.