Renfe activará un plan alternativo con bus e taxi por unhas obras que condicionarán o tráfico ferroviario na estación da Coruña
Renfe porá en marcha un plan alternativo de transporte os días 27 e 28 de marzo para asegurar os desprazamentos dos viaxeiros durante as obras que Adif executará na infraestrutura ferroviaria da estación da Coruña.
A intervención afectará aos últimos servizos da tarde do venres 27 con destino á cidade herculina e tamén ás circulacións con orixe ou destino na estación coruñesa ata o mediodía do sábado 28. Segundo informou a compañía, os traballos previstos nesas dúas xornadas son incompatibles coa circulación habitual de trens, polo que será necesario reorganizar parte da operativa.
En total, o dispositivo deseñado por Renfe inclúe autobuses e taxis para 27 servizos. A medida impactará nas liñas de Media Distancia que unen A Coruña con Vigo, Santiago de Compostela, Ferrol e Lugo, así como na conexión de Alta Velocidade con Madrid, en ambos sentidos. Neses casos, unha parte do percorrido farase por estrada.
A empresa advirte ademais de que o transbordo pode alongar os tempos de viaxe. Para tentar manter os horarios das paradas intermedias, algúns trens afectados poderán adiantar a súa saída desde a estación da Coruña, mentres que as chegadas poderán producirse máis tarde do habitual.
As repercusións das obras non rematarán aí. Renfe tamén prevé que entre os días 29 e 31 de marzo haxa pequenas modificacións nos tempos de viaxe dalgúns servizos por necesidades operativas derivadas destas actuacións, o que suporá engadir algúns minutos ao traxecto previsto.
Ante esta situación, a compañía recomenda aos usuarios consultar os horarios antes de iniciar a viaxe. Os billetes e a información actualizada poden revisarse nas canles habituais de Renfe, como as billeteiras, as máquinas de autovenda, a App da compañía, o teléfono 912 320 320 e a súa páxina web.