Preto dun milleiro de fogares de Arteixo súmanse aos programas de mellora da fracción orgánica
O Concello de Arteixo está a piques de acadar o milleiro de fogares inscritos nos programas municipais de mellora da fracción orgánica, iniciativas coas que a veciñanza pode beneficiarse dunha rebaixa do 15% no recibo do lixo.
No núcleo urbano de Arteixo son xa preto de 800 os domicilios que solicitaron a tarxeta electrónica necesaria para abrir o colector de residuos orgánicos, mentres que arredor de 200 fogares optaron polo programa de compostaxe doméstica, no que o Concello facilita de balde un composteiro para o tratamento dos restos orgánicos en parcelas privadas. En conxunto, estas dúas modalidades suman case 1.000 vivendas adheridas.
O novo sistema de acceso ao colector orgánico vén de implantarse nas últimas semanas no núcleo urbano de Arteixo, coa instalación dun peche dixital que só permite o uso ás persoas inscritas no programa. O obxectivo é garantir unha correcta separación dos residuos, xa que a presenza de lixo indebido pode inutilizar todo o contido do colector para a súa reciclaxe. No primeiro semestre de 2026, este modelo estenderase progresivamente ao resto dos núcleos urbanos do municipio.
As persoas que se adhiran a este sistema ou ao programa de compostaxe poderán beneficiarse dunha redución do 15% na taxa, pasando o recibo semestral de 62,92 euros a 53,48 euros a partir de 2026.
Desde o Concello lembran que Arteixo municipalizou o servizo de recollida de residuos no ano 2018 e foi o primeiro concello de Galicia en implantar illas de cinco colectores adaptadas aos criterios de reciclaxe marcados pola Unión Europea, reforzando a separación das principais fraccións de residuos.